60 ka bungi na-operahan sa Pinamungajan
CEBU, Philippines - Niabot sa 60 ka bata ang napaubos sa Operation Pahiyom sa tulo ka adlaw nga pagpang-opera sa mga bungi sa una’ng higayun sa Dr. Jose Maria Borromeo Memorial District Hospital sa lungsod sa Pinamungajan niadto’ng Huwebes hangtud kagahapon.
Gatusan ang gipaubos sa screening apan 60 lang ang nakapasar kay ang ubang may gihambin nga sakit sama sa hilanat, ubo ug gipang bitok.
Matud ni Dr. Geraldine “Gaye” Yapha nga molungtad sa 45 minutos ang major operation gamit ang general anesthesia.
Ang Operation Pahiyom gipaluyohan sa Kapitolyo, Ratoray Club Fuente, Smile Train ug Craniofrancial Foundation of the Phils. Inc. ubos sa paningkamot ni Bokal Grecilda "Gigi" Sanchez.
Matud ni Sanchez nga may susama nga facility ang Vicente Sotto Memorial Medical Center apan ang anaa sa kabukiran dili makaabot sa P15 mil nga gastuhon hinungdan nga gipaduol nila nga libre ang operasyon.
Human sa Pinamungajan, gipahibawo ni Sanchez nga sundan kini sa ubang bahin sa probinsiya.
Giklaro ni Sanchez nga dili pamolitika ang kalihukan.
Target sa Kapitolyo nga malibot ang tanang lungsod sa maong medical mission sa dili pa matapos ang una’ng termino ni Gobernador Hilario Davide III. (BANAT NEWS)
- Latest
