Dispatser, porter, konduktor sa CSBT ipa-drug test

CEBU, Philippines - Mga dispatser, konduktor ug porters sa Cebu South Bus Terminal (CSBT) giplanohang ipaubos sa drug test human nasuta nga daghan na kaayong mga drayber sa mga pasaheroan ang nasakpang mga adis-adis.

Sa gipahigayong Kapistorya sa Kapitolyo niadtong Biyernes dunay mga sugyot nga apilon ang mga dispatser, porter ug ubang mga kawani sa terminal sa drug test aron mahimong drug free ang mga terminal.

Ang hepe sa Cebu Provincial Anti-Drug Abuse Commission (CPADAC) nga si Joey Hererra nagkanayon nga kung ang mga dispatser kawani sa mga bus company ang kagamhanan sa probinsiya makapugos kanila nga ipaubos og drug test.

Apan aron labing epektibo ang drug test ang tagdumala sa CSBT ang magbuot sa pagpahigayon sa drug test.

Matud ni Hererra nga pwede silang makigsabot niini sa mga bus operators alang usab sa galastohan sa drug test nga ipahigayon.

Sa laing bahin, ang mga dispatser diha sa CSBT nga wala’y mga ID ang pagawason sa terminal matud sa operation manager sa CSBT nga si Ramon Dumayac.

Gikataho nga nagkadaghan ang mga dispatser diha sa CSBT diin uban kanila ang dili kawani sa mga bus company.

Matud ni Dumayac nga ang mga bus companies mihangyo kanila nga ang bag-ong ID nga iisyu sa dispatser kinahanglan dunay pirma nila una pirmahan sa CSBT manager pagsiguro nga ang dispatser nga gihatagan og ID legitimate kini nga dispatser sa bus company.

Gibutyag ni Dumayac nga mipadala na siya og suwat sa mga bus companies ug giawhag sila nga ipasurender ang mga daan nga ID sa ilang dispatser aron mahatagan kini og bag-ong ID.

Ang matag bus company adunay upat ka dispatser nga gitugot sa CSBT.

 Ang mga bus company giawhag usab sa pagpasul-ob og uniporme nga t-shirt sa ilang mga dispatser aron mailhan kini.

Dugang ni Dumayac nga lakip sa mga porter sa CSBT ang hatagan usab og ID ug pasul-obon usab og uniporme nga t-shirt.  (BANAT NEWS)