Baboy delikado sa heat stroke

CEBU, Philippines - Delikado sa heat stroke panahon sa ting-init ang kahayupan ilabina ang baboy nga baga og tambok sa lawas sumala pa sa Provincial Veterinary Office.

Hinuon ang mga daku’ng piggery nasayud na sa ilang buhaton sama sa pagbutang og electric fan.

Si Mary Rose Vincoy, provincial veterinarian, nagkanayun nga ang mga baboy kaligoon ka duha o ka tulo sa matag adlaw ug dunay tubig nga ibutang sa palibot nga mainom.

Gawas sa heat stroke ang hayop delikado usab sa pneumonia panahon sa ting-init.

Gipasabot ni Vincoy nga dunay lugar nga init kaayo sa adlaw unya inig ka gabii pwerte sab nga bugnawa.

Sa kanding, panahon sa ting-init ang kasagaran niini’ng sakit mao ang luas.

Matud ni Vincoy nga ang mga mag-uuma sa kabarangayan sa probinsiya giedukar na kabahin sa maong sitwasyon.

Ang PVO ug ang Department of Agriculture nagpahigayun og info caravan sa mga mag-uuma kabahin sa El Niño.

Ang mga mag-uuma giawhag sa pagduol sa ilang municipal agriculture office kung may masinati nga problema sa ilang kahayupan ug pagpa-insured sa ilang mga hayupan sa Philippine Crop Insurance Corporation.

Ang kagamhanan sa probinsiya mao’y mobayad sa premium sa insurance ug wala na’y ihatag nga counterpart ang lungsod.

Kung mamatay ang na-insured nga hayop, ang Kapitolyo ang makadawat sa bayad ug mopalit og hayop nga mahatag ngadto sa mag-uuma hulip sa namatay. (Brenda D. Batuto/GMR)(BANAT NEWS)