CEBU, Philippines - Ipakatap sa lainlaing dapit dinhi sa Central Visayas ang kapin sa unom ka libo ka polis atol sa pag-obserbar sa Semana Santa aron pagpaninguha nga mapabilin ang kahapsay ug kalinaw sa mao nga mga adlaw.
Si Senior Superintendent Rey Lyndon Lawas, hepe sa Regional Investigation Detection and Management Division sa Police Regional Office-7, mitug-an nga pakatapan nila og mga polis ang mga lugar nga duna’y dagko’ng relihiyoso’ng kalihokan.
Dinhi sa dakbayan sa Sugbo tutukan sa kapolisan ang seguridad sa pagahimuon nga Buhing Kalbaryo nga magsukad sa Patio San Nicolas paingon sa simbahan sa Guadalupe ingon man sa Good Shepherd sa Sitio Banawa, Guadalupe.
Sa probinsya sa Sugbo, destinohan ‘sab og mga polis ang mga isla nga sagad bisitahon sa mga lokal ug langyaw nga mga turista sama sa Isla sa Bantayan ug sa lungsod sa Minglanilla.
Apil sa bantayan sa mga polis mao ang mga pantalan ug terminal aron masiguro ang kaluwasan sa tanan nga mobiyahe atol sa Semana Santa ug sa mga daghang pista karong bulan sa Mayo.
Tambag sa kapolisan nga kun sila mobiya sa ilang panimalay angay’ng may tahasan sila sa pagbantay aron sila dili mabiktima sa mga kawatan. (Jojo C. Ugdol/RUB)(BANAT NEWS)