CEBU, Philippines - Gipadayag ni Cebu Archbishop Jose Palma nga mas maayo ang pagpamalandong ug pagbag-o sa kinabuhi inay nga mopahimulos sa taas nga bakasyon pinaagi sa paglingaw-lingaw.
Nanghinaot si Palma nga huwaton una sa katawhan nga mahuman ang Semana Santa una maglipaylipay sa bakasyon.
Giawhag sa Arsobispo ang katawhan nga unta moapil sa pagpamalandong pinaagi sa pagsalmot sa mga kalihukan sa simbahan sama sa pagpaminaw sa Siete Palabras, pag-uban sa prosesyon sa Biyernes Santo, Adoration of the Holy Cross ug ubang kalihukan nga naglakip sa Visita Iglesia.
Sa Abril 2 (Huwebes Santo), dunay pito ka simbahan nga moapil sa himuong IEC Visita Iglesia dinhi sa dakbayan sa Sugbo nga magsugod alas 7:30 sa gabii.
Kini pinaagi usab sa pakigtambayayong sa mga tagdumala sa IEC ngadto sa 15 ka mga barangay kapitan ug sa CITOM aron mahimong hapsay ug malinawon ang kalihukan.
Samtang girespeto ni Palma ang mga pamaagi sa tawo pagpakita sa ilang sakripisyo apan gi-discourage sa simbahan ang pagpasakit sa kaugalingon pinaagi sa pagpalansang sa krus ug paglatos sa kaugalingon. (Decemay P. Padilla/EIM)(BANAT NEWS)