CEBU, Philippines - Lalaki nga taga Limasawa, Southern Samar nga miapas sa iyang girlfriend dinhi sa Sugbo gipatay sa iyang karibal sulod mismo sa boarding house sa babaye didto sa Poblacion Oriental, Consolacion kaniadto’ng Miyerkules sa gabii.
Si Junrey Suan, 22, namatay diha-diha dayon kay maayo’ng pagkaagtang diha nga gipusil siya ni Michael Yuson, 23, nga laing uyab sa cashier nga si Fritzie Llones.
Ang suspetsado nga si Yuson, taga Barangay Sacsac, Aloguinsan, dali nga milayas ug gipangita pa sa mga polis. Si SPO1 Francisco Perez Jr. sa Consolacion Police Station miingon nga si Suan ug Yuson pareho’ng boyfriend sa 23-anyos nga dalaga.
Si Suan uyab ni Llones sulod sa lima ka tuig na ang milabay ug silingan sila didto sa Samar. Si Yuson usa pa lang ka buwan nga nauyab sa dalaga ug kauban sila sa trabaho sa dako’ng tindahan sa Consolacion apan gibuwagan na niya kini.
Sila si Llones ug Suan nagkateksanay ug nagsabot nga apason ang dalaga dinhi sa Sugbo ug gani iya pa kini’ng gisugat diha nga miabot ang ulitawo sa pantalan sa Sugbo ug gidala sa iyang boarding house sa Consolacion.
Samtang moadto na unta sa banyo si Suan aron maligo, may nanuktok sa pultahan sa boarding house. Pag-abli ni Llones, nakurat siya pagkakita nga ang miabot mao si Yuson.
Mihangyo si Yuson nga mosulod aron magka-estorya sila sa uyab sa kanhi niya girlfriend. Diha’ng nag-atubang na sila, gisukna ni Yuson si Llones kun kinsa g’yud kanila ni Suan ang iyang pilion.
Naghilak si Llones diha nga giingnan niya si Yuson nga si Suan maoy iyang pilion. Naglamanoha’y pa ang duha ka lalaki.
Nagpatuo si Yuson nga mobiya na ug giingnan ang iyang karibal “Sige bay, ampingi na ang babaye nga akong gimahal.”
Apan kalit lang mihulbot si Yuson og armas gikan sa iyang hawak ug gipusil sa ulo si Suan. (BANAT NEWS)