CEBU, Philippines - Gisingit ni Mayor Michael Rama ang pundo sa pagpatukod sa bag-ong Cebu City Medical Center atol sa pagpakigtagbo ni Budget Secretary Florencio Abad sa mga mayor sa Central Visayas kagahapon.
Si Abad nibisita sa Sugbo alang sa Bottom-up Budgeting (BuB) sa nagkalainlain nga local government units nga gitambungan sa 105 ka mga mayor sa rehiyon.
Ang kalihukan gihimo sa Sotogrande Hotel sa Mactan, dakbayan sa Lapu-Lapu.
Apan si Abad niingon nga ang sentimento ni Rama angayang tubagon sa Office of the Presidential Assistant for Rehabilitation and Recovery (OPARR) ilabi na sa Department of Health.
Dugang gipadayag ni Rama ang tinguha nga mga proyekto sama sa mga taytayan nga magdugtong sa mga probinsiya sa Kabisay-an.
Si Abad niingon nga hatagan sa Department of Budget and Management og pagtagad ang mga proyekto sama sa infrastructure, health institutions, eskwelahan ug uban pa nga alang sa mga kabus. (BANAT NEWS)