CEBU, Philippines – Usa ka sakop sa usa ka notadong robbery group ang nasikop sa mga sakop sa Provincial Intelligence Branch didto sa Sitio Dawis, Barangay Banban dakbayan sa Bogo niadtong nakalabay nga adlaw.
Ang dinakpan naila nga si Wendel Araneta, 36, nagpuyo sa maong lugar.
Matud pa ni Senior Police Officer 1 Reynaldo Solante ang team leader sa PIB sa Cebu Provincial Police Office nga nakadawat sila og reklamo bahin sa armadong tawo nga nagbahisbahis sa maong dapit.
Ang PIB diha sa maong dapit tungod sa laing kaso nga gisundan dihang giduol sila sa mga residente ug misumbong bahin sa suspek.
Dihang ilang giadto, ilang nasigpatan ang suspetsado ug dihang ilang gisita ug girekisa nakuhaan kini og usa ka kalibre 45 pistola nga dunay bala. Ang suspetsado gikatahong sakop sa Ancero-Sumabong Robbery Group nga naglihok sa probinsya sa Sugbo.
Gawas sa armas nakuhaan usab kini og duha ka dagkong putos sa gituohang shabu nga mikantidad og kapin sa P100 mil. Gitanggong na sa karsel sa PIB ang suspetsado nga gikatakdang pasakaan og tukmang kaso. – /EIM) (BANAT NEWS)