15 ka brgy may krisis sa tubig
CEBU, Philippines – Kinse ka mga barangay sa siyudad sa Sugbo ang adunay krisis sa tubig human masinati ang mild El Niño.
Mao kini ang barangay Babag, Malubog,Pung-ol Sibugay, Lusaran, Guba, Binaliw, Sapangdaku, Buhisan, Busay, Adlaon, Kalunasan, Budlaan, Cambinocot, Sirao ug Pamutan.
Ang mga barangay kapitan sa maong mga dapit miduol na ug nangayo’g tabang sa opisina ni Vice Mayor Edgardo Labella kagahapon aron mangita og solusyon sa maong problema.
Tungod niini, si Labella mihangyo sa Bureau of Fire Protection-7 nga mohatag og tubig sa maong mga barangay.
Mihangyo usab ang bise mayor sa Metropolitan Cebu Water District (MCWD) nga mabutangan og fire hydrants ang maong mga barangay.
Si Babag Barangay Captain Cesar Dolorito miingon nga ang iyang barangay lisod nang daan sa tubig ug mas misamot pa g’yud kini karon tungod sa El Niño.
Matud ni Dolorito nga kapin sa 300 ka mga residente sa iyang barangay ang apektado sa maong krisis sa tubig, kadaghanan kanila mga mag-uuma. – /EIM) (BANAT NEWS)
- Latest
