Lima ka tulisan nadakpan
CEBU, Philippines – Gipresentar kagahapong adlawa sa buhatan sa Cebu Provincial Police Office ang lima ka mga suspetsado sa nahitabong pagpanulis sa usa ka negosyanteng babaye sa usa ka subdivision sa Bangkal dakbayan sa Lapu-Lapu niadtong nakalabay nga buntag.
Ang mga dinakpan naila nga sila si Rodrigo Boyles, hingkod taga Ubay, Bohol, Khent Colanggo, 21, taga Mabini Bohol, Gary Jaylo, 34, taga Garcia, Bohol, Jericho Francisco, 23, taga Sinacaban ,Misamis Oriental ug Richie Signar, 34, nga taga Sinacaban Misamis Oriental.
Ang lima ka mga suspetsado nasikop sa hiniusang pwersa sa kapulisan sa Oslob, Alcoy, Santander ug Boljoon human nga gialarma ang mga buhatan sa kapulisan sa posibleng pag-eskapo sa mga suspetsado human gitulis si Maritess Amit. Sumala pa sa hepe sa Lapu-Lapu Police nga si Senior Superintendent Armando Radoc nga ilang gialerto ang hepe sa CPPO nga si Senior Superintendent Noel Gillamac sa posibilidad nga moikyas sa mga gagmay’ng pantalan ang mga tulisan.
Nakuha gikan sa lima ka mga dinakpan ang usa ka KG9 sub machine pistol, usa ka caliber .40, duha ka .45 caliber pistols nga duna’y tulo ka magazine ug 18 ka mga bala.
Lakip sa narekober sa mga polis ang P149,000 nga kwarta ug Montero ni Amit. Gidudahang sakop sila sa usa ka daku nga robbery gang sa Mindanao ug Bohol. Duna pa’y usa nga ilang gipangita.
Nasikop usab sa kapulisan ang usa ka Joy Chan nga gidudahan nilang kakunsabo sa mga suspetsado aron biktimahon si Amit pinaagi sa pag-abli sa pultahan sa gate ug balay sa biktima aron sila makasulod. – /EIM) (BANAT NEWS)
- Latest
