CEBU, Philippines - Kaso sa grassfire ang sagad nga gitubag nga alarma sa sunog sa Bureau of Fire Protection sa lungsod sa Pinamungajan niini’ng pagsaulog sa Fire Prevention Month.
Matud ni Fire Officer 1 Rizaris Caintig nga upat ka kaso sa sunog ang ila’ng gialarmahan karong buwana diin tulo niini mga grassfires ug ang sunog sa merkado publiko sa Pinamungajan.
Sa barangay Rizal ang ulahi nga girespondehan sa bombero sa grassfire ingon man sa barangay Cambiangon ug Pandakan.
Tungod niini subli’ng nipahimangno ang kabomberohan nga dili mokompiyansa sa mga tinapok nga mga sagbot ilabi na mga dahon tungod sa grabe’ng kainit nga posible’ng kalit nga mosilaob.
Ang BFP sa Pinamungajan adunay duha ka service firetrucks ug pito ka bombero apan ang duha padayun sab nga nagbansay-bansay sa Laguna. (BANAT NEWS)