CEBU, Philippines - Gipasakaan og kaso sa kapolisan ang gikatahapang pusher og shabu sa barangay Bili, lungsod sa Borbon nga nadakpan sa buy-bust operation sa niagi’ng gabii.
Ang gipasakaan og kaso mao sila si Juvy Monton, 26, uban sa 17-anyos nga lalaki nga temporaryo nga gibalhug sulod sa detention cell sa kapolisan sa maong lungsod.
Si Senior Police Officer 2 Richeleun Artista sa Borbon Police Station niingon nga si Senior Inspector Arvi Arbuis, hepe sa Borbon Police Station, kauban sa Philippine Drug Enforcement Agency (PDEA)-7 ang nipahigayun sa buy-bust operation.
Matud ni Artista nga si Monton mao’y tumong sa operasyon human nila nakuha ang kasayuran sa ilegal nga kalihukan diha’ng usa ka pusher sa maong lugar ang ilang nadakpan.
Dugang ni Artista nga nunot sa pagkasikop ni Monton ug sa minor de edad nga kauban maoy ilang nasakmit ang tulo ka pakete’ng shabu uban sa drug paraphernalia ug P200 nga marked money nga gigamit sa ilang police decoy nga nagpatuo nga kustomer.
Si Monton gituohan sa kapolisan nga mohalin og napulo ka pakete matag adlaw nga pagpamaligya. (BANAT NEWS)