38,000 kaso wa mahusay — Sereno
CEBU, Philippines - Mas paspas na unya ang pagresolbar sa mga kaso diha sa korte pinaagi sa Electronic Court sa Korte Suprema nga ang tumong aron mamenusan ang nagtipun-og nga mga kaso.
Si Supreme Court Chief Justice Ma. Lourdes Sereno kinsa mianhi sa Sugbo alang sa 15th Integrated Bar of the Philippines National Convention miingon nga dunay 38,000 ka mga kasong natanggong dinhi sa Sugbo.
Buot niya nga pinaagi sa mga repormang gipatuman sa Korte Suprema mamenusan bisan ang 30 porsiyento niini.
Usa sa solusyon mao ang gitawag nga Electronic court diin mahimong ipaagi na lang sa electronic mail (e-mail) ang pagpadala sa mga pleadings o apelar sa mga kaso.
Pinaagi niini wa na unya’y mga dokumento nga kinahanglang dad-on sa mga dunay transaksyon sa Korte Suprema.
Naglakip sa reporma ang electronic-cash o electronic assessment diin ang mga balayrunon diha sa korte ipaagi na sa electronic –transfer , ipaagi na usab sa electronic raffle ang mga kaso kun kinsa ang huwes ang mohusay aron way makaimpluwensya sa kaso kun kang kinsa angay mapunta ang kaso.
Nagtuo si Sereno nga pinaagi sa mga bag-ong sistema ma-monitor na nila ang tanang korte sa tibuok nasud ug di na kinahanglang ipatawag ang mga huwes.
Sa pagkakaron, ang siyudad pa sa Lapu-Lapu ang duna nay electronic court samtang gitun-an ang pagbutang usab niini diha sa Cebu City Palace of Justice.
Buot sa Korte Suprema nga apil ang lower courts nga kinahanglang makabaton og electronic court aron mas paspas ang pagresolbar sa tanang mga kaso. Usa usab sa gitan-aw sa Korte Suprema karon ang naghuot nga mga prisohan tungod niining nagtipun-og nga wala pa madesisyoni nga mga kaso. (Decemay P. Padilla/EIM)(BANAT NEWS)
- Latest
