CEBU, Philippines - Usa ka 62-anyos taxi drayber ang gitulis sa iyahang duha ka pasahero diha sa Camella Homes Subdivision, Phase 2 sa dakbayan sa Lapu-Lapu. Matud ni Police Officer 2 Niño Mancao sa Mactan Police Station 2, nailhan ang biktima nga si Jesus Narmoada, residente sa lungsod sa Consolacion.
Nasayran nga gikan sa dakbayan sa Mandaue ang duha ka pasahero ug nagpahatud sa nahisgutang dapit.
Apan pag-abot ni Narmoada sa nahisgutang subdivision, kalit mideklarar og tulis ang duha ka pasahero.
Gikuha sa duha ang P3, 000 nga kwarta nga kinitaan ni Narmoada ug pagkahuman gipakanaog kini sa mga tulisan sa iyahang taxi ug misutoy og padagan ang mga suspetsado.
Sa gihimong follow-up operation ilang nakit-an nga gibiyaan ang taxi nga nahimutang duol sa usa ka spa massage sa Sitio Cabatuan, Maribago.
Ang kapolisan padayon pang nag-imbestigar sa maong kaso. (Christell Fatima Tudtud/EIM)(BANAT NEWS)