Sunog sa Lorega gihinumduman
CEBU, Philippines - Takdo usa ka tuig na ang nakalabay gihinumduman sa mga residente ang daku’ng sunog sa barangay Lorega nga niulbo niadto’ng Marso 18 sa niaging tuig nga nikaon sa dul-an 1,000 ka panimalay.
Niadto’ng Miyerkules sa hapon, usa ka santos nga misa ang gipahigayun ni Msgr. Rey Penagunda.
Dungan niini ang pag-turnover sa bag-ong kapilya sa barangay Lorega nga halad sa Alay sa Diyos Community.
Si Bob Gothong, sakop sa maong pundok, ang ni-turnover sa bag-ong kapilya nga kantidad og dul-an sa usa ka milyon ka pesos ngadto sa kagamhanan sa siyudad sa Sugbo pinaagi ni Bise Mayor Edgardo Labella ug gihatag sab ngadto sa mga opisyal sa barangay.
Matud ni Labella nga hinay-hinay na nga nakabangon ang mga molupyo sa Lorega ug ang kabalayan nahan-ay na ug napaubos na sa re-blocking ang lugar.
Si Lorega barangay kapitan Fritz Herrera niasoy nga nagsagol ang iya’ng gibati ilabi na nga ila gyud nasagubang ang trahedya nga niabot kanila gikan sa sunog hangtud na sa pagpabalik sa mga residente.
Pito ka sitio ang apektado sa sunog diin dul-an sa 5,000 ka tawo ang naapektuhan. (BANAT NEWS)
- Latest
