LCR, korte sa San Fernando gilungkab
CEBU, Philippines - Gilungkab sa wala pa mailhi’ng kawatan ang buhatan sa Local Civil Registrar ug Municipal Trial Court sa lungsod sa San Fernando pasado alas 8 sa nakalabay nga gabii.
Matud ni Chief Insp. Sara Jane Recla, hepe sa San Fernando Police Station, nga gumikan kay wala’y daku nga kantidad sa salapi sulod sa duha ka buhatan, mga sinsilyo ang giapil og dala sa kawatan.
Buntag na nadiskubrehan sa usa sa mga empleyado nga gilungkab na ang maong mga buhatan.
Gikan sa korte nadala sa kawatan ang P300 ug sa LCR nakuha ang kapin P1,000 lakip na ang mga sinsilyo.
Si Recla niingon nga posible’ng didto na daan sulod sa maong buhatan ang kawatan atol sa pagsirado sa mga empleyado ug nagpaabot lang kini nga mogabii.
Wala’y close circuit television (CCTV) camera ang maong mga buhatan.
Sigun sa hepe nga dili kini ang una’ng higayun nga gilungkab ang maong buhatan. Nagtuo si Recla nga posible’ng taga San Fernando lang ang nihimo sa krimen. (BANAT NEWS)
- Latest
