CEBU, Philippines - Liwas pa sa piyesta sa dakbayan sa Mandaue masinati ang kahuot sa dagan sa trapiko nunot sa nagpadayun nga proyekto sa Department of Public Works and Highways sa dalan A. S. Fortuna ug Highway Seno.
Matud sa project supervisor sa DPWH-7, Engr. Raymond Cataluña, nga nakasinati gyud og kalangan sa paghuman sa road concreting ug drainage improvement tungod kay maputol ang ilang pagtrabaho sa panahon sa adlaw.
Dugang nakalangan ang pagpadaplin sa daku’ng tubo sa tubig nga naigo sa ilang gikawot nga maoy magsilbi’ng water catchment sa pagpugong sa tubig nga dili moawas nga moresulta sa pagbaha.
Nakahatag sab og daku’ng kakulian ang tubo sa Metropolitan Cebu Water District nga kun masipyat maputol ug mawagtang ang supply sa tubig sa dakbayan sa Lapu-Lapu, Cordova ug Consolacion.
Gi-ampingan usab ang mga linya sa Visayan Electric Company (VECO) Philippine Long Distance Telephone Company (PLDT) ug uban pa.
Hinuon si Cataluña niingon nga sa higayun nga mapahimutang na ang mga box culvert sa A.S. Fortuna ug Highway Seno, ila’ng gipaneguro ang dinalian nga paghuman sa proyekto liwas sa piyesta sa Mandaue sa Mayo 8 tungod kay sa Mayo 26 ang ilang pagbanabana sa paghuman niini. ((BANAT NEWS)