Hepe ug tulo ka sakop parelibohan sa mayor
CEBU, Philippines - Upat ka mga polis sa dakbayan sa Talisay ang girekomendar sa mayor nga parelibohan sa ilang katungdanan nga naglakip sa hepe sa maong buhatan.
Si Cebu Provincial Police Office, Senior Superintendent Noel Gillamac mibutyag nga mipadala kaniya og suwat si Mayor Johnny V. De Los Reyes nga buot niya silang pailisan.
Ang maong mga polis naglakip nila ni Supt. Reycel Dayon, hepe sa Talisay City Police, Insp. Rico Emperwa, deputy chief sa Talisay City Police, SPO2 Oliver Dacua ug SPO1 Mike Espina.
Base sa unod sa suwat nga gikan sa mayor kini miingon nga ang upat ka mga polis nagkunsabo aron mapasakaan kini og kaso nga arson.
Si Gillamac miingon nga iyang iduso sa Regional Offices Placement Promotion Board sa Police Regional Office-7 ang hangyo sa mayor.
Giangkon usab ni Gillamac nga “below standard” g’yud ang labok sa mga polis sa maong siyudad.
Gihulagway sab sa opisyal nga usa ka “drug haven” ang maong dakbayan apan kadaghanan sa napasakang kaso kalapasan lang sa Section 11 (possession) sa R.A. 9165 ug dili Section 5 (selling) nga mas bug-at og silot.
Dili motuo si Gillamac sa rason nga gamay ra kaayo ang mga sakop sa TCPS sanglit parehas ra kini sa Liloan Police Station apan maayo ang ilang labok pagsumpo sa ilegal nga drugas. (BANAT NEWS)
- Latest
