Drug pusher napusilan
CEBU, Philippines - Nasamdan ang usa ka gipasanginlang drug pusher human napusilan sa mga polis atol sa buy-bust operation diha sa Sitio Panog, Barangay Don Juan Climaco dakbayan sa Toledo.
Giila ang nasamdan nga si Jerome Traya Cabante, 28, taga Kawayan, Barangay Cambang-og sa maong dakbayan human kini napusilan ni Police Officer 2 Melchezedick Batomalaque dihang nisukol kanila.
Ang operasyon gipangulohan ni Inspector Jovito Labra apan ang target mao si Ariel Engaling Segarra, 38, nga aduna gihapoy pending nga kaso sa drugas sa San Carlos City, Negros Occidental.
Usa ka poseur buyer ang nipalit kang Segarra apan dihang dakpon na unta kini ni PO1 Readan Lara kalit kining mibunot og armas nga .357 rebolber si Cabante ug gipusil ang maong polis, apan suwerte nga paltik ang armas ug mikagar.
Si Batomalaque daling nakapusil sa sampot sa suspek ug nilapos kini sa tuo nga paa. Nasikop usab sila si Danilo Engaling Traya, 50, ug Elton Engaling Traya, 29, pulos taga sityo Panog barangay Don Juan Climaco nga kauban sa mga suspek.
Sa pagrekisa sa kapulisan nakuha gikan kang Ariel nga maoy subject sa buy-bust ang duha ka gagmay nga pakete, upat ka medium size nga gituohang shabu ug ang buy-bust money.
Samtang si Danilo nasakmitan og duha ka medium size ug kalibre 45 nga armas ug usa ka magazine nga adunay unom ka bala, si Elton nakuhaan og tulo ka gagmay nga pakete sa shabu.
Si Jerome nakuhaan sa iyang posisyon og duha ka dagko nga pakete, usa ka medium size, usa ka .357 nga kalibre sa armas nga adunay upat ka bala ug usa ka granada.
Daling gidala sa Toledo City Hospital si Jerome apan gibalhin ra usab kini sa tambalanan sa dakbayan sa Sugbo. (BANAT NEWS)
- Latest
