CEBU, Philippines – Patay na nga nadiskubrehan sa anak ang iya’ng amahan nga nagbitay sulod sa pansayan sa apartment nga ila’ng gipuy-an ug gituohang naghikog pinaagi sa paghigot og electrical wire sa liog alas 9 pasado sa niagi’ng gabii.
Ang namatay mao si Teofilo Daulo Bodoso, 56, lumad nga taga Iloilo ug temporaryo nga nagpuyo sa Ouano Apartment sa barangay Alang-Alang, dakbayan sa Mandaue.
Si Police Officer 3 Dante Flores sa Presinto 1 sa Mandaue City Police Office (MCPO) niingon nga sa imbestigasyon nga ila’ng gihimo, si Bodoso nisulod sa pansayan sayo pa sa gabii human sa ilang panihapon.
Ang 17-anyos nga anak lalaki nga nisulod unta sa pansayan ang nahingangha nga nagbitay na ang iyang amahan nga wala na’y kinabuhi.
Nakaplagan sa Scene of the Crime Operatives (SOCO) ang suicide note alang sa anak nga nangayo og pasaylo sa iya’ng paghikog tungod kay dili na maantus ang problema sa iyang trabaho.
Si Bodoso nagtrabaho sa Philippine Amusement and Gaming Corporation (PAGCOR)-Mactan.
Matud ni Flores nga ang anak nga ilang nahinabi niingon nga ang iya’ng amahan may gihambin nga balatian. – /GMR) (BANAT NEWS)