CEBU, Philippines – Usa ka ginang nga mibalibad pagpahuwam og kwarta gitulis ug pagkahuman gisuwayan og lugos apan nakadagan samtang nakagapos ang iyang mga bukton aron makapangayo og tabang sa mga silingan diha sa Barangay Luy-a, Lungsod sa Medellin.
Ang biktima mao ang 46 anyos nga ginang nga nagpuyo sa maong dapit samtang ang suspetsado mao si Allan Aman Cabag, 26, taga Lamintac Norte sa maong lungsod.
Si Senior Police Officer 2 Roselito Ortega sa Medellin Police Station miingon nga gisaka sa suspetsado ang biktima ug mihangyo kini nga manghulam og kuwarta apan mibalibad ang biktima hinungdan sa kasuko sa suspek.
Matud pa nga gibinaklid og gapos sa suspek ang biktima ug gisuwayan sa paglugos, apan giingong gisikaran kini sa biktima ug nakadagan apan natagak kini sa hagdanan.
Ang biktima nagsige og singgit pagpangayo og tabang sa mga silingan hinungdan nga nitalaw ang suspek ug mikaratil kini pagdagan.
Si Ortega miingon nga ang silingan sa biktima nga si Engineer Milbert Mepieza maoy dali nga nakatawag sa ilang buhatan.
Ang hepe sa kapolisan nga si Senior Inspector Christopher Fernandez dali nga naghimo og hot pursuit operation nga miresulta sa pagkadakop sa suspetsado sa panimalay niini samtang kini nag -impake sa iyang mga butang alang na unta sa pagsibat. Nakuha nila ni Senior Inspector Fernandez ang kuwarta nga P3,000 ug cellphone sa biktima ug lakip na usab sa kutsilyo nga gigamit niini.
Ang biktima nga nakabaton og mga bun-og sa iyang kalawasan dali nga gidala sa tambalanan sa Vicente Sotto Memorial Medical Center sa dakbayan sa Sugbo ug ang suspetsado temporayo karong gitanggong sulod sa detention cell sa kapolisan sa maong lungsod. – /EIM) (BANAT NEWS)