CEBU, Philippines — Nasikop sa mga sakop sa Philippine Drug Enforcement Agency (PDEA) 7 ug City Intelligence Branch (CIB) ang usa ka gidudahang drug pusher, usa ka drug den operator ug 11 ka tawo nga nasakpan sud sa drug den diha sa Barangay Ermita, Cebu City.
Ang gipasanginlang drug pusher nga nadakpan mao si Joremo Fuentes Gollodo, 28, ug ang drug den operator mao si Panfilo Degamo Anana, 50.
Nasikop ‘sab sila si Fatima Minoza Rico, 25; Virgilio Lada, 21; Erwin Talugon Montecalvo,31; Ariel Bagul Flores, 24; Neil Banilad Galo, 31; Ronel Tura Cereno, 27; Jimmy Himongala Cruz, 42; Darryl Minoza Flores, 31; Jermene Paca Pateres, 28; Jhomar Tublan Carticiano, 22; Rowen About Ombajin, 27. Ang 11 ka tawo gidakop kay naaktohan sila diha mismo sa drug den samtang gipahigayon ang operasyon.
Si PDEA7 Regional Director Jeffrey Bangsa, nga nahinabi sa Banat News miingon nga gipaubos nila sa surveillance ang maong drug den tungod sa nadawat nilang mga reklamo.
Sumala pa niya nga nakig-alayon usab sila sa CIB sa maong operasyon sanglit aktibo man sad ang maong buhatan sa kampanya sa illegal nga drogas.
Nasikop si Gollodo human nga mibaligya kini og shabu sa usa ka PDEA agent ug gisunod dayon ang pagronda sa drug den.
Nakuhaan og 356 packs ka gagmay nga pakete’ng shabu nga mobalor og P.5 million si Gollodo lakip na sa subject sa buy-bust ug ang buy- bust money nga P400.
Samtang daghang drug paraphernalia ang nasakmit diha sa drug den. Matud pa ni Bangsa nga 24/7 ang operasyon sa drug den ug duna kini tulo ka magbalantay nga magpulipuli. Ang 13 ka tawo nga nadakpan natanggong sa PDEA 7 detention center samtang giandam pa ang kaso nga ipasaka batok kanila. (BANAT NEWS)