CEBU, Philippines - Kritikal ang kahimtang sa usa ka taxi driver nga giagtang sa pagpusil samtang nag-parking duol sa Cebu International Convention Center sa dakbayan sa Mandaue ala una pasado gahapon sa kadlawon.
Si Police Officer 1 Mar Villamonte sa Presinto 1 sa Mandaue City Police Office (MCPO) niila sa biktima nga si Donald Quella, 35, drayber sa Holiday Taxi nga nagdala sa plate number GXJ 689.
Matud ni Villamonte nga sulod sa gimaneho’ng taxi ang biktima nga nagpaabot sa mosakay nga pasahero diha’ng giduol sa wala hiilhi’ng lalaki ug gidul-itan sa armas ang agtang dayun pusil niini.
Dali nga nisibat ang mamumuno samtang ang biktima ang gidala sa Mandaue City Hospital.
Gisalikway sa kapolisan ang anggulo nga pagpanulis tungod kay wala kuhaa sa mamumuno ang cellphone ug bag sa biktima nga gisudlan sa kinitaan. (Romeo T. Limpangog/GMR)(BANAT NEWS)