Guwardiya naunay sa armas
CEBU, Philippines - Patay ang usa ka guwardiya nga naunay sa iya’ng improvised nga pugakhang sulod sa compound sa Nagasaki Shipyard sa Bangkerohan, Tayud, Consolacion alas 8 pasado ang takna sa niagi’ng gabii.
Si Senior Police Officer 3 Renario Patillas sa Consolacion Police Station niila sa namatay nga si Edizon Dura, hingkod ang panuigon nga taga dakbayan sa Lapu-Lapu.
Nasayran nga kauban sa biktima ang lain pang guwardiya nga si Eddie Dumolong nga nakig-estorya sa welder nga si Eduardo dela Cruz, 40, taga sitio Lapyahan, Jagobiao, dakbayan sa Mandaue.
Naglingkod ang biktima nga naggunit sa pugakhang nga kalit lang nibuto hinungdan nga dali nga niduol si Dumolong ug nakita nga nagkadugo na ang tuo’ng abaga sa biktima.
Dali nga gidala sa Mandaue City Hospital ang biktima apan gideklarar nga dead on arrival.
Si Patillas niingon nga bisan kun wala’y foul play ang kamatayun sa biktima apan ila’ng giawhag ang pamilya sa pagpaubos sa autopsy sa patay’ng lawas pagsuta sa hinungdan sa kamatayun niini.
Gitataw ni Patillas nga mohimo pa sila og dugang pakisusi sa pugakhang nga nakaingon sa kamatayun sa biktima tungod kay ang mga guwardiya gitugutan lang og kargada nga kalibre .38 ug shotgun. (Romeo T. Limpangog ug NSU Intern Donahmae Gadugdug/GMR)(BANAT NEWS)
- Latest
