50 gihilantan

CEBU, Philippines - Dul-an 50 ka mga residente ang giingong nagkasakit ug nakasinati og kapin na sa usa ka buwan nga hilanat diha sa Sitio Bayabas, Barangay Subayon dakbayan sa Toledo.

Gawas sa paghilanat, matud pa nakasinati usab sila og pagpanakit sa tiyan, kalawasan, gitakigan, mawad-an og gana sa pagkaon, labad sa ulo, magsuka ug kalibang ug adunay pipila nga magkalibang na og dugo.

Nagmulo ang  mga residente tungod kay magbalik-balik ang ilang hilanat bisan nakainom na kini og tambal.

Usa ka Amay Edina, 22, ug laing tulo ka mga residente ang gidala sa tambalanan tungod sa grabeng hilanat ug pagkaluya sa lawas.

Sa pakighinabi kang Florante Lariba, barangay kapitan sa Subayon, kini mibutyag nga gipadala niya sa Toledo City Hospital ang mga nasakit.

Usa ka Joel Cauyon ang nagduda nga ang langaw gikan sa poultry farm sa maong lugar ang hinungdan nga nagkasakit ang mga tawo.

Dugang ni Cauyon nga sa nakalabay nga mga semana daghang langaw sa   matag balay sa maong lugar hilabi sa higayon nga mag-harvest na ang poultry. Nasayran nga adunay duha ka poultry farms sa maong lugar nga duol ra sa kabalayan. Samtang si City Health Sanitary Inspector Antonio Layan Jr. mibutyag nga base sa mga gipakitang sintomas nagduda sila nga dengue ang maong sakit.

Si Dr. Esperanza Canumay, ang labaw sa City Health Office  mimando na sa pagpahigayon og water sampling sa tinubdan sa tubig sa maong lugar aron matan-aw kun dili ba gikan sa ilang tubig ang kagaw nga nakaingon sa sakit. Nasuta nga usa ray atabay nga kuhaan sa mga tawo og tubig sa maong dapit, aduna hinuon kini tabon. Susihon pa usab sa city health ang kalimpiyo ug permit sa duha ka poultry farms nga nag-operate sa maong lugar. (Raymond Abarcas/EIM)(BANAT NEWS)