Bag-ong CCPO tukuron
CEBU, Philippines - Tukuron karong tuiga ang moderno nga Cebu City Police Office Headquarters sa Camp Sotero Cabahug.
Kini human naaprobahan na sa kagamhanan sa dakbayan sa Sugbo ang P50 milyones nga gahin alang sa proyekto.
Matud ni Alvin Santillana, operations chief sa City Disaster Risk Reduction Management Office, nga kinahanglan na gyud nga makabaton og bag-ong buhatan ang kapolisan.
Sa gihimo’ng pakisusi, namatikdan ni Santillana nga delikado kaayo sa sunog ang buhatan sa Crime Scene Investigation, Homicide Section, Mobile Patrol Group ug uban pa nga buhatan nga kahoy pa ang dapat sa building ug makita nga karaan na kaayo sulod sa kampo.
“If you are to check the area its fire hazard pa gyud sa nakita nato unya dilapidated na kaayo ang building, the Cebu City Police Office deserves a new building na gyud,” matud ni Santillana.
Si Supt. Artemio Ricabo, hepe sa Finance and General Services ug kasamtangan sab nga hepe sa MPG, niingon nga daku og matabang ang mao’ng plano aron makaangkon na sila og bag-ong buhatan.
“Need na gyud kaayo kay century old na gyud na nga building ba, kani’ng amoa diri PC time pa kung imong sudlon uyog-uyog na kaayo, nalipay sab mi kay supportive kaayo si mayor sa Cebu City Police Office. Masugdan gyud na this year kay ang budget para man na this year,” matud ni Ricabo. (BANAT NEWS)
- Latest
