CEBU, Philippines - Way mga punoan sa kahoy diha sa Salinas Drive ug sa S. Osmeña nga gitinguhang pangibton o pamutlon alang sa pagpalapad sa mga dalan sa maong mga dapit.
Kini human ang Department of Environment and Natural Resources (DENR-7) mipahibalo nga naabtan ang Department of Public Works and Highways (DPWH-7) sa memorandum gikan ni DENR Secretary Ramon Paje nga tanang aplikasyon sa pagputol o pag-ibot sa mga kahoy nga maigo sa public works kinahanglang balikon og review una pa tugotan. Niadtong Hulyo sa miaging tuig ang DPWH-7 mipadala og suwat sa DENR kalabot sa plano nga road widening sa Salinas Drive duol sa Technical Education and Skills Development Authority (TESDA).
Adunay 41 ka mga punoan sa kahoy nga maapektahan sa maong proyekto, apan matud sa tigpamaba sa DENR-7 nga si Eddie Llamedo wa dayon makompleto sa DPWH ang mga rekisitos ug naabtan kini sa memorandum ni Paje.
Ang Cebu City misang-at gihapon og special tree cutting permit sa gihapon mag-agi pa kini sa proseso kay kinahanglang masusi kini ni DPWH Sec. Rogelio Singson una pa isyuhan og permit.
Nasayran usab nga si TESDA -7 Regional Director Rosanna Urdaneta mipadayag nga wa silay supak sa road widening apan kinahanglang way mga kahoy nga pamutlon.
Sa samang kalamboan, dili makapahigayon og earth balling ang siyudad sa mga kahoy sa center island sa S. Osmeña Avenue gumikan kay wala pa gilibkas ang Cease and Desist order batok niini.
Ang CDO gipagawas human mawagtang ang 79 ka mga kahoy sa S. Osmeña human gipangibot ug wala na igkita gumikan sa road concreting nga gihimo sa DPWH sa lugar sa miaging tuig.
Wa usab tumana sa DPWH ang mga rekisitos nga gipangayo sa DENR nga ilisan og usa ka libo ka punoan sa kahoy ang matag usa ka punoan nga kuhaon diha sa center island. Nahanaw ang 79 ka punoan sa maong dapit sa miaging tuig. (BANAT NEWS)