CEBU, Philippines - Patay ang usa ka 60-anyos nga lolo nga sakop sa Lupo’ng Tagapamayapa human kini napatiran sa usa ka babaye nga duna’y nakabugno nga laing babaye sa Sitio Lagtang Barangay Ocaña dakbayan sa Carcar.
Ang biktima giila nga si Cesar Fantonial, nagpuyo sa maong lugar samtang ang suspetsado naila nga si Rosarie Sarsa, 33.
Matud pa ni Police Officer 2 Madison Singco imbestigador sa Carcar Police nga nahinabi sa Banat News gikan nanugway sa iyang mga hayop ang biktima apan sa iyang pag-uli iyang nakita nga nagbugno ang duha ka mga babaye nga sila si Sarsa ug usa ka Alicia Padin.
Sumala pa ni Singco nga selos ang hinungdan sa panagbugno sa duha ka babaye nga nagbinirahay og buhok apan sa pag-uwang sa biktima napatiran kini ni Sarsa ug natumba.
Naundang ang bugno sa duha dihang ilang nakita nga nakuyapan si Fantonial ug gitabang sa mga silingan, apan patay na kini pag-abot sa Carcar City District Hospital.
Sigun pa ni Singco nga atake sa kasingkasing ang namatyan sa biktima base sa death certificate niini, apan kini resulta sa pagkatumba dihang napatiran ni Sarsa. Gibalhog na sa bilanggoan ang suspetsado ug gikatakdang pasakaan og kasong homicide. (BANAT NEWS)