CEBU, Philippines - Gisubay karon sa kapolisan ang usa ka talagsaong hitabo diin usa ka 16-anyos nga lalaki ang gidudahang milugos sa usa ka 13 -anyos nga babaye didto sa Barangay Guadalupe sa nakalabay nga gabii, apan ang ginikanan pa sa suspek maoy misumbong sa mga otoridad.
Ang hepe sa Guadalupe Police Station nga nahinabi sa Banat News miingon nga dili pa kini makasiguro kung duna ba’y pagpanglugos ang nahitabo, apan ang nakalahi sa kaso, ang ginikanan pa sa lalaki maoy misumbong sa barangay.
Matud pa ni Senior Inspector Allan Rosario , ang ginikanan sa lalaki miduol sa Gender and Development Program sa Guadalupe ug maoy mi-refer niini ngadto sa ilang buhatan.
Sumala pa ni Rosario nga wala pa sila’y nadawat nga pormal nga reklamo batok sa 16-anyos apan naghimo na sila og imbestigasyon bahin niini.
“Walay allegation nga rape, gi-refer man sa amoa that’s why mangutana ta unsay nahitabo,” matud pa ni Rosario.
Ang focal person sa Gender and Development Program sa barangay Guadalupe nga si Rosalinda Ledama nga nahinabi sa mga tigbalita wala na sab mokomento bahin sa kaso tungod kay atoa na kini sa kapulisan.
Apan si Ledama miingon nga kining ingon niini nga mga krimen resulta kini sa pagsige og tan-aw sa mga batan-on sa mga “porn sites” sa internet ug ang uban maka-access niini sa mga piso piso nga internetan.
Sigun pa ni Ledama nga duna sila’y girespondehan nga naglambigit sa magsuon diin ang lalaki nga 9 anyos milugos sa 3-anyos niyang manghod, matud pa ang maguwang magsige og tan-aw sa mga “porn sites” sa internetan.
Giawhag karon sa GAD sa Guadalupe nga kinahanglan nga iparehistro ang tanang internetan sa ilang barangay. (BANAT NEWS)