LDRRMO sa talisay kuwang pa

CEBU, Philippines - Giangkon sa Local Disaster Risk Reduction Management Office (LDRRMO) sa dakbayan sa Talisay nga kuwang ang personnel ug mga equipments sa pagresponde sa kalamidad.

Matud sa pangulo sa LDRRMO, Christopher Estrabon, nga nanginahanglan sila og igo’ng suporta sa kagamhanan nga hatagan og budget ang opisina nga dili mominus sa singko porsiyento sa annual budget.

Karong tuiga adunay P34 milyones nga budget ang LDRRMO sa Talisay nga gihulagway nga kuwang ra alang sa pagpatuman sa mga programa subay sa balaud sa tinguha nga zero casualty atol sa kalamidad.

Sa pagkakaron, ang LDRRMO adunay fully-equipped life support aparatus ang disaster truck ug ambulansiya.

Giumol karon sa LDDRMO ang Barangay Enhancement Responds and Emergency (BERE) nga magsilbi’ng taytayan sa mga opisyales sa tanang barangay sa Talisay nga ipaubos sa training isip first responder panahon sa kalamidad.

Buot si Estrabon nga adunay operation center ug repeater ang LDRRMO aron makalihok og maayo.

Naglaum si Estrabon nga mahatag sa kagamhanan ang iya’ng mga gipangayo. (BANAT NEWS)