CEBU, Philippines – Nadakpan ang usa sa 10 most wanted persons sa lungsod sa Borbon nga nag-atubang og kaso’ng pagpanglugos sa panimalay nga iya’ng gipuy-an sa Dumlog, dakbayan sa Danao alas 6 pasado ang takna sa niagi’ng gabii.
Si Police Officer 1 Raffy Tejares sa Borbon Police Station niila sa nadakpan nga si Jesus Daigding, 50, minyo nga taga sitio Kamugaw, barangay Bangoyan sa mao’ng lungsod.
Si Judge Antonio Marigomen sa Branch 61 sa Regional Trial Court sa dakbayan sa Bogo ang niluwat sa warrant of arrest batok sa dinakpan niadto’ng Agosto 28, 2013 ug wala’y piyansa nga girekomendar.
Matud ni Tejares nga sukad sa pagluwat sa warrant of arrest kalit lang usab nawagtang ang akusado sa ilang panimalay hangtud nakadawat og impormasyon ang kapolisan nga kini nasigpatan sa dakbayan sa Danao. – /GMR) (BANAT NEWS)