CEBU, Philippines – Tulo ka gatos ka drayber ang nalutsan og bench warrants sa Municipal Trial Court in Cities Branch 1 tungod sa paglapas sa lagda sa trapiko sa siyudad sa Sugbo.
Matud ni Jonathan Tumulak, operations chief sa City Traffic Operations Management nga ang mga drayber wala gihapon manumbaling sa ilang mga multa human na-isyuhan og citation tickets.
Gibutyag niya nga 103 niini ang gikan sa South District, 74 usab ang sa North District, samtang 55 ang sa central nga mga publikong sakyanan. Aduna ‘sab 27 ka pribadong sakyanan ug 48 ang mga drayber sa taksi.
Ang pagkiha kanila ug paglusot sa bench warrants matud pa usa ka paagi pagdisiplina sa mga drayber nga badlungon.
Awhag ni Tumulak sa mga drayber nga nalutsan og bench warrant nga atubangon kini ug bayran ang ilang mga multa diha sa CITOM kay kun dili mas modako pa unya ang ilang problema.
Pwedeng bayran sa mga drayber ang tanang violation ug laing P2, 000 alang niadtong mga kaso nga napasaka na sa korte.
Ang bench warrants gi-issue sa sala ni Judge Monalila Tecson tungod sa kalapasan sa Cebu City Traffic Ordinance 801. Mando ni Tumulak sa mga drayber nga kun ma-isyuhan sila og citation ticket, dili kini i-disregard kay makapasaka sila og kaso batok sa mga badlongon nga mga drayber. – /EIM) (BANAT NEWS)