CEBU, Philippines- Human sa tulo ka buwan nga anaa sa kustodiya sa social workers sa probinsya sa Sugbo, nakauli na g’yud ang 16-anyos nga “mangingingilad” sa ilang lugar sa Sogod, Southern Leyte.
Kini human sa kataposan, gidawat siya pagbalik sa iyang amahan (stepfather) nga kaniadto mibalibad sa pagdawat kaniya.
Matud ni Rose Jao, ang assistant officer-in-charge of the Provincial Social Welfare and Development Office (PSWDO) ila untang i-turnover ang maong babaye sa usa ka shelter sa Tacloban City.
Apan wa kini misugot ug nasuko hinuon ug gipanglabay ang mga butang sa mga social workers, hangtud nga ang maong shelter sa Tacloban midumili na sa pagdawat kaniya.
“She thought iadto siya sa ilang balay. Amo man siyang giingnan daan nga ‘day depende ani kung dawaton ka sa imong amahan. Unsaon pag-adto nga di pa man siya dawaton sa family, sa iyang stepfather,” matud ni Jao.
Gitawgan na lang sa mga awtoridad ang amahan sa maong minor ug nakombinsir kini nga kuhaon siya ug gidala sa ilang panimalay kauban gihapon ang mga social workers. Hinuon, monitoron gihapon siya sa mga social workers sa Tacloban.
Niadtong Pebrero 25 ning tuiga gidala siya sa National Bureau of Investigation, Department of Social Welfare and Development, ug Civil Security Unit sa Kapitolyo sakay sa barko didto sa Leyte. (BANAT NEWS)