Hatagan sa hinabang sa Yolanda gihashasan

CEBU, Philippines - Gihashasan una pag-ayo sa kagamhanan sa lungsod sa Daanbantayan ang mga hatagan sa emergency shelter assistance (ESA) kinsa mga biktima sa bagyo’ng Yolanda.

Matud ni Mayor Augusto Corro nga usa sa nasuta sa revalidation mao nga usa ka balay adunay lima ka pamilya ang nagpuyo nga tagsatagsa nga nangayo og hinabang.

Gibutyag ni Corro nga dunay mga kwalipikado usab nga angayan makadawat apan wala sa listahan sa Department of Social Welfare and Development (DSWD).

Gani matud sa mayor nga dunay mga pamilya nga nangangkon nga totally damaged ang ilang balay apan partially damaged lang kini.

Sa listahan sa DSWD, nikabat sa 16,678 ka pamilya ang makadawat sa ESA ug maoy gibasehan sa pagpagawas sa P425.8 milyones nga pundo.

Sa lagda sa DSWD, kadtong pamilya nga may binuwan nga kita nga sobra sa P15 mil ug kadtong namuyo sa danger zones ang dili makadawat sa hinabang.

Matud ni Corro nga dili siya uyon sa maong lagda tungod kay ang maong pamilya nabiktima sab sa bagyo.

Kadto’ng pamilya kinsa ang balay partially damaged makadawat og P10,000 ug ang totally damaged nga balay makadawat og P30,000. (BANAT NEWS)