CEBU, Philippines – Duha na ‘sab ka empleyado sa Cebu City Hall ang nagpositibo sa paggamit og ilegal nga drugas ang nasakpan atol sa random drug test nga gipahigayon sa Cebu City Office for Substance Abuse Prevention kon COSAP.
Si Dr. Alice Utlang, pangulo sa COSAP, miingon nga naduso na niya sa City Legal Office ug Human Resource and Development Office (HRDO) ang resulta sa drug test alang sa tukmang lakang nga buhaton niini.
Miabot na og 105 city hall employees ang napaubos sa drug test sa COSAP gikan sa 18 ka mga departamento ug opisina sa kagamhanan sa siyudad.
Matud ni Utlang nga walo kanila ang nagpositibo sugod Enero ning tuiga hangtod karon. “Maka-ingon na hinuon ko nga wala g’yud giseryoso sa mga empleyado atong mga trainings and seminars last year kay mas daghan na man hinuon karon nga March pa gani,” matud niya. Sa miaging tuig, ang COSAP nakapaubos og random drug test sa 551 ka trabahante sa City Hall apan 15 lang niini ang nagpositibo.
Nagtuo unta ang COSAP nga mokunhod ang drug users nga empleyado karong tuiga tungod sa mga trainings ug seminars apan karon naguol siya kay Marso pa lang aduna nay walo nga nagpositibo.
Tungod niini, makig-coordinate siya sa HRDO sa paghimo’g mga seminar aron magpadayon molikay sa drugas ang mga trabahante. – /EIM) (BANAT NEWS)