Way shabu laboratory sa Cebu City – Capa

CEBU, Philippines – Bisan pa man sa dagkong kantidad sa shabu nga nasakmit sa kapolisan di gihapon mawala ang maong problema hangtud nga di masakpan kun asa ang laboratoryo niini.

Mao kini ang giangkon ni Senior Superintendent Conrad Capa ang deputy Regional Director for Operations sa Police Regional Office 7.

Matud pa ni Capa sukad pa kaniadtong 1989 sa pagsud niya sa serbisyo hangtod karon nga hapit na siya moretiro nagpabilin gihapon ang problema sa illegal nga drugas.

“Sa 1989 Narcotics Command ako nand’yan na, magre-retire na lang ako nand’yan pa rin,” matud pa ni Capa.

Sumala pa ni Capa dako kaayo ang mahimo batok niini kun ang barangay makig-alayon sa kapolisan batok sa ilegal nga drugas.

Giangkon ni Capa nga lisod dakpon ang mga utok niini apan mahimo kini kun magtinabangay ang tanan.

Niadtong adlaw’ng Lunes, nasikop sa CIB ang level 1 drug pusher sa Sitio Mangga, Barangay Mambaling diin moabot og dul-an sa P6 milyones  nga shabu ang nakuha.

Bisan sa dinagko na ang kantidad sa shabu nga ilang nasakmit, wa sila maka-monitor nga dunay drug laboratory dinhi sa dakbayan.

Gitutukan karon sa kapulisan ang mga lugar diin naghitak ang problema sa illegal nga drugas kini sama sa Barangay Mambaling, Ermita, Duljo Fatima, A.Lopez, Pasil, Inayawan ug uban pa.

Si Capa miingon, sa milabay’ng tuig miabot og 3,231 ka drug personalities ang ilang nasikop ug sa kinatibuk-an mokabat sa 10 kilos nga shabu ang ilang nakompiskar. – /EIM) (BANAT NEWS)