Cash assistance ihatag karong adlawa
CEBU, Philippines – Gikatakda nga makadawat sa cash assistance karong adlawa Marso 2, 2015 ang mga senior citizens sa dakbayan sa Toledo.
Mao kini ang mga lolo ug lola nga nalista apan wala pa makadawat sa financial assistance sa nakalabay nga buwan sa Disyembre sa nakalabay nga tuig. Gikan kini sa panudlanan sa lokal nga kagamhanan sa dakbayan sa Toledo.
Gibana-bana nga moabot sa 833 ka mga senior citizen ang mahatagan og tag P2,500 nga cash incentives. Adto kini ipanghatag sa Cebu Electric Company (CEBECO) III compound sa barangay Luray Dos dakbayan sa Toledo.
Samtang kadtong wala pa nalista angayan usab nga moduol sa buhatan sa Office of the Senior Citizens o OSCA aron marehistro ug posibleng makadawat sa maong insentibo sa sunod nga pagpanghatag sa cash assistance.
Nasayran nga adunay kapin sa 12 mil ka mga senior citizens ang dakbayan sa Toledo.
Ang maong cash assistance abag sa mga senior citizens nga usa usab sa tinguha ni Toledo City Mayor John Henry Osmeña. – /EIM) (BANAT NEWS)
- Latest
