CEBU, Philippines - Andam na ang committee on complaints and investigation sa Provincial Board sa ilang desisyon sa kaso’ng administratiba nga gipasaka ni Bise Mayor Efren Guntrano Gica batok ni Mayor Nelson Garcia sa lungsod sa Dumanjug.
Ang rekomendasyon sa komitiba gikatakda’ng tukion atol sa sesyon sa PB karo’ng Lunes.
Si Bise Gobernador Agnes Magpale niingon nga kung unsa man ang ilang desisyon sa kaso, may 30 ka adlaw pa nga maka-apelar si Garcia ngadto sa buhatan sa Presidente.
Apan si Magpale nagdumili pagbutyag kung unsa ang rekomendasyon sa komitiba nga gipangulohan ni Bokal Arleigh Sitoy.
Si Sitoy nagdumili usab pagbutyag sa nakab-ot nga rekomendasyon sa komitiba.
Kaso’ng abuse of authority ang gipasaka ni Gica batok kang Garcia nunot sa giingong pagtudlo sa mayor sa secretary sa Sangguniang Bayan nga gahum sa bise-mayor.
Kini usa lang sa mga kaso nga gipasaka ni Gica batok kang Garcia kinsa nisang-at usab og mga kaso batok sa bise-mayor.
Si Garcia nakahukom nga i-withdraw ang iya’ng gipasaka nga mga kaso batok ni Gica sa pasangil nga wala kini atimana sa hunta probinsiyal. (BANAT NEWS)