CEBU, Philippines – Sugdan na sa Asian Marine Transport Corporation ang pag-develop sa usa ka bahin sa Talisay City Fish Port bisan wala pa’y memorandum of agreement (MOA) tali sa Cebu Port of Authority (CPA) ug lokal nga kagamhanan.
Ang MOA maglatid sa giya sa bayranan nga boarding fees sa mga barko nga modunggo lakip na ang bahin sa abang kada buwan sa kompaniya tali sa CPA ug LGU sa Talisay.
Matud ni Talisay City Legal Officer Alfredo Sipalay nga manginahanglan na usab og authority si Mayor Johnny Delos Reyes gikan sa konseho alang sa pagpirma sa MOA.
Gisugdan na sa Asian Marine ang pag-recruit og gatusan ka trabahante sama sa welders ug uban pa’ng skilled workers sa pag-develop sa fish port.
Una’ng buhaton ang pagpalawom sa dagat aron makasulod ang mga dagku’ng barko.
Si Gerlie Villagonesa, HR manager sa Asian Marine, nipahibawo nga unahon nila pagdawat ang mga taga Talisay.
Samtang giklaro ni Delos Reyes nga nalangan ang pinirmahay sa kontrata gumikan kay gipasusi pa sa iyang abogado.
Mokabat sa 25 ka tuig ang abang sa Asian Marine sa fish port sa kantidad nga P800 mil. – /GMR) (BANAT NEWS)