CEBU, Philippines – Patay na nga nakit-an sa mga silingan ang 34-anyos nga iskultor kinsa naghikog gamit ang electrical wire sulod sa ilang panimalay sa sitio Sanggutan, Daanlungsod, Medellin niadto’ng nakalabay nga sayo sa buntag.
Ang naghikog naila nga si Florentino Guatno Jr., ulitawo ug nagpuyo sa maong lugar.
Matud ni PO1 Rosano Queddeng, desk officer sa Medellin Police, nga sa ila’ng nasayran nga sa wala pa naghikog si Guatno kini nitug-an sa iyang mga silingan nga siya gipadamgo sa iyang amahan nga pipila ka buwan pa lang namatay gumikan sa balati-an.
Sumala pa ni Queddeng nga nabantayan sa mga silingan nga human sa pagpadamgo, kanunay na lang nagmagul-anon si Guatno.
Gani naningkamot pa kini nga makigkita sa iyang mga igsuon sa dakbayan sa Sugbo.
Katapusa’ng nakita nga buhi ang lalaki niadto’ng nakalabay nga gabii sa dihang kini nitan-aw og duwa sa basketball sa Medellin Sports Complex.
Si Queddeng nagtuo nga posible’ng gimingaw lang sa iyang amahan si Guatno nga kanunay nga magpakita sa iyang damgo.
“Wala pud mi nahibalo og unsa’y gi-estoryahan nila sa iya’ng papa nga nagpadamgo, basta nakatug-an siya nga nagpadamgo daw ang amahan niya,” matud ni Queddeng. – /GMR) (BANAT NEWS)