Diarrhea sa Danao magsilbi’ng leksiyon

CEBU, Philippines – Nanghinaut ang Regional Epidemiology and Surveillance Unit (RESU-7) nga dili na masubli ang kaso sa diarrhea sa Cebu Mitsumi, Inc. sa dakbayan sa Danao.

Nasuta nga tubig gikan sa Sabang Waterworks System ang positibo sa kagaw base sa resulta sa water sampling nga gihimo sa RESU-7.

Matud sa hepe sa RESU-7, Dr. Renan Cimafranca, nga dunay atabay duol sa Sabang Waterworks ug giingo’ng konektado ra ang duha ug nasuta nga sa ibabaw nga bahin dunay septic tank hinungdan nga dali ra makontaminado ang tubig.

Dugang ni Cimafranca nga angay gyud seguruhon nga layo sa kontaminasyon ang supply sa tubig ug kinahanglan protektahan aron dili mataptan og sakit sama sa tipos.

Kagahapong adlawa usab gitakda ang repeat sampling sa tubig sa Mitsumi aron pagsusi kun negatibo na gyud kini sa contamination samtang lakip usab sa tan-awon ang residual chlorine kun natuman ba ang rekomendasyon sa RESU-7.

Nagkanayon si Cimafranca nga gipasalig sa kagamhanan sa siyudad nga dili na ka balik og paninda ang mga ambulant vendors gawas sa Mitsumi kun dili sila makakuha og health and sanitary certificates.

Sa uwahing talaan sa RESU-7 nasuta nga tulo ang nagpositibo sa vibriocholera. – /GMR) (BANAT NEWS)