CEBU, Philippines - Hingusgan sa kagamhanan sa Mandaue ang ilang kampanya sa pagpanalipod sa kalikopan nga pagapangulohan ni City Environment and Natural Resources Officer (CENRO) Engineer Ricardo Mendoza.
Si Mendoza mao usab ang pangulo sa Solid Waste Management program sa Mandaue ug gitahasan sa pagpatuman sa tukma’ng paghipos sa basura nga makamugna og pagbaha.
Si Konsehal Jimmy Lumapas, tsirman sa Committee on Agriculture sa konseho sa dakbayan, miingon nga ilang suportahan ang pagpanalipod sa kalikopan dili lang sa pagpangubkob og bas sa kasapaan kun dili lakip na ang mga butang sa kadagatan.
Matud ni Konsehal Lumapas nga ang mga mananagat nga nagpuyo sa walo ka barangay daplin sa kabaybayonan maoy nagtaho ngadto sa iyang buhatan sa ilegal nga pagpanagat sa ilang dapit nga makahatag og epekto sa ilang panginabuhi.
Tungod niini ang namugna nga Bantay Dagat sa dakbayan magsugod na sa ilang operasyon kay hingpit na man nga napalit ang patrol boat nga maoy ilang masakyan pagpatrolya sa kadagatan sa ilang teritoryo.
Ang patrol boat anaa karon sa buhatan sa City Agriculture sa Barangay Ibabao-Estancia kay ang maong buhatan mao man ‘sab ang mohimo pagkumpleto sa gikinahanglan nga dokumento sa dili pa kini gamiton. (BANAT NEWS)