CEBU, Philippines - Nagtingkagol karon sa prisohan ang usa ka inahan ug ang iyang uyab nga Australian human nga ang 14-anyos nga dalagitang anak sa babaye mireklamo nga daw gilawog siya sa iyang inahan ngadto sa uyab niini.
Ang langyaw naila nga si Stephen Baker, 59, samtang gipugngan lang sa Banat News ang ngalan sa inahan sa biktima.
Base sa imbestigasyon sa kapolisan nga ang biktima giingong gilugos sa langyaw niadtong Miyerkules sa gabii sulod sa ilang giabangang balay sa dakbayan sa Bogo.
Si Police Officer 3 Glecilda Claro, sa Women’s and Children’s Protection Desk, sa Bogo City Police Station nga nahinabi sa Banat News miingon nga nakadawat sila og tawag gikan sa Medellin Police Station kalabot sa taho nga dunay “incest” nga nahitabo sa Bogo. Apan dihang nagpahigayon na sila og imbestigasyon nasuta nga rape ug dili incest (o ang paghilawas sa managkadugo)ang nahitabo.
Sumala pa ni Claro nga mireklamo ang biktima nga gipugos siya sa iyang inahan sa pagtan-aw og malaw-ay nga salida ug gisugo pa siya niini nga makighilawas sa uyab sa inahan nga langyaw.
Matud pa ni Claro dihang mibalibad ang bata gikasab-an kini og maayo sa inahan hangtud nga milampos g’yud si Baker paglugos sa biktima atubangan mismo sa inahan.
Tungod sa reklamo daling gisikop ang inahan ug ang Australian national ug gitanggong dayon sa prisohan.
Posible nga mag-atubang og kaso nga kalapasan sa Anti-Rape Law, Expanded Anti-Trafficking in Persons Act of 2012 ug Violation Against Women and their Children ang langyaw ug ang inahan sa biktima. (BANAT NEWS)