Problema sa 93-1 tukion

CEBU, Philippines - Subling gisaad ni Gob. Hilario Davide III nga resolbahon ang problema kabahin sa 93-1 lots diha sa Bario Luz, dakbayan sa Sugbo ug ang uban pang lote nga gipanag-iya sa probinsiya.

Kagahapon sa buntag kuyog kang Cebu City Councilor Nida Cabrera ang mga residente nga nagpuyo sa nahisgutang lote nga mianha sa Kapitolyo aron kumustahon ang kabahin sa giokupar nilang luna.

Matud ni Davide nga tun-an sa technical working group ang mga sugyot sa mga molupyo ilabi na kabahin sa pagbayad ug sa presyo sa matag luna, nasayran nga managlahi og presyo depende sa barangay ang mga luna.

Niadtong tuig 2012 si Bise Presidente Jejomar Binay ang nangulo sa pagpirma sa memorandum of understanding (MOU) tali sa kagamhanan sa probinsiya aron tugotang paliton sa mga namuyo ang luna nga ilang gipuy-an. Si Binay maoy chairman sa Housing and Urban Development Coordinating Council (HUDCC) milagda sa MOU tali kang kanhi gobernador Gwendolyn Garcia ug Mayor Michael Rama.

Ang mga luna nga gipanag-iya sa probinsiya nga giukupahan sa urban poor families nahimutang kini diha sa Barangay Kalunasan, Kamputhaw, Busay, Lahug, Capitol Site, Barrio Luz, Mabolo, Apas, Kasambagan, Tejero ug Lorega. (BANAT NEWS)