Colon himoa’g laing drainage
CEBU, Philippines – Giplanohan karon sa Department of Public Works and Highways (DPWH-7) ang pagbuhat og laing agianan sa tubig sa dalan Colon aron pagsulbad sa problema sa baha sa dapit.
Sa niaging mga buwan, gipatawag sa kagamhanan sa siyudad sa Sugbo ang mga nanag-iya og istruktura sa lugar nga nakalapas sa three-meter easement zone policy ug gimandoan nga pasapsapan ang ilang mga buildings nga nilapas.
Apan matud ni Cebu City Legal Officer, Atty. Jerone Castillo, nga gasto na kaayo ug lisud kun pasapsapan pa ang mga buildings.
Sigun niya nga aduna na’y kompleto’ng plano ang DPWH-7 sa dalan Colon ug iya lang gipaabot nga mahatag kini ngadto kagamhanan sa siyudad aron mabuhatan og budget ug mapahibawo ang mga tag-iya sa mga establesemento sa maong plano. Base sa inisyal nga plano, ang bag-ong agianan sa tubig ibutang ilawom sa dalan aron dili makaapekto sa mga istruktura sa dapit.
Sugyot ni Castillo nga paamuton ang mga tag-iya sa establesemento nga nakalapas sa balaud sa pagpatuman sa plano.
Ang dalan Colon usa ka national road nga ubos sa pagdumala sa DPWH-7. – /GMR) (BANAT NEWS)
- Latest
