Paghatag og ngipon sa CCAIB di na ipadayon
CEBU, Philippines – Tungod sa grabeng pagsaway sa nagkadaiyang sektor ug ang pagsupak sa mga tigbalita, dili na ipadayon sa Cebu City Anti-Indecency Board ang planong pag-amendar sa mga probisyon sa kasamtangang Anti- Indecency Ordinance sa dakbayan. Ang gustong mahitabo sa CAIB mao nga hatagan sila og dugang gahom ug ngipon aron sakmiton ang mga basahon nga sa ilang tan-aw malaw-ay bisan og walay mando sa korte.
Ang Cebu Citizens-Press Council (CCPC) ug Cebu Media Legal Aid (Cemla) mipadayag nga dakong kalapasan sa balaod ang buot buhaton sa CAIB. “It deliberately abridges the freedom of expression,” matud pa sa mga tigbalita tungod kay matud pa magsusama na og usa ka hukom ang taga CAIB kun ilang sakmiton ang mga basahon ug tanggungon samtang paabuton ang desisyon sa korte kun malaw-ay o dili ang basahon.
“Ang katong uban natong amendment sa CCAIB nga katong portion on reading materials kinahanglan og naay court order, so dili na lang namo i-apil, dili na lang mi mo-kuan(insister) adto nga amendment kay daghan man kaayo og maapil gud,” matud ni Lucelle Mercado, CCAIB Chairman.
Saysay ni Mercado nga ang CCAIB nakadesisyon sa pagtangtang niini atol sa gipahigayon nga meeting sa board sa miaging semana. Gani, giimbitahan sa board si CCPC executive director Pachico Seares nga mo-attend sa maong meeting. Apan mipadala og position letter si Seares ngadto kang Mercado nga dili na kini kinahanglan motambong sa maong meeting tungod ang iyang stand sa amendment pareha ra sa baroganan sa CCPC ug Cemla.
Gani, matud ni Seares nga apil siya sa mitungha sa public hearing sa miaging tuig kalabot sa proposed amendment.
Si Konsehal Leah Japson ang mi-sponsor sa proposed ordinance nga mo-amend sa City Ordinance 1408 nga maoy mimugna sa CCAIB.
Matud ni Japson nga angay aprobahan ang ordinansa tungod mao kini ang mohatag og ngipon sa CCAIB sa kampanya batok sa malaw-ay nga mga buhat. – / EIM) (BANAT NEWS)
- Latest
