CEBU, Philippines – Wa manawagan si Cebu Archbishop Emeritus Ricardo Cardinal Vidal pagpakanaog sa pwesto ni Presidente Benigno Aquino III sumala pa ni Cebu Archbishop Jose Palma.
Si Palma sa opisyal nga pamahayag nga gipadangat ni Media Liaison Officer Msgr. Joseph Tan, kini miklaro nga igo lang gipabasa sa statement nga giandam daan sa National Transformation Council (NTC) si Vidal apan dili kadto mao ang tingog sa Catholic Bishops Conference of the Philippines.
Matud pa nga post birthday celebration ni Vidal ang tuyo sa NTC sa balay niini niadtong Biyernes.
Si Palma miingon nga dili g’yud si Cardinal Vidal ang nanawagan nga pakanaugon si Aquino tungod kay nasayod man kini nga wala siya sa posisyon aron mohimo niini.
Dugang sa pamahayag ni Palma kinsa tua karon sa Our Lady of Manaoag sa Pangasinan, ang panawagan pagkanaog ni Aquino usa ka political statement.
Si Father Joseph De Aquino ang secretary ni Cardinal Vidal midason usab nga igo lang gibasa ni Vidal ang posisyon sa NTC. Matud niya dili buot ni Vidal nga manghilabot sa nasudnong kagamhanan.
Sumala pa ni Father De Aquino gisakitan ang Cardinal sa mga nanggawas nga balita tungod kay siya man hinuoy migawas nga maoy nanawagan sa pagpa-resign sa presidente.
Samtang, si Msgr. Joseph Tan nipadayag nga girespeto ni Archbishop Palma ug ni Cardinal Vidal ang mga panawagan sa nagkadaiyang grupo o indibidwal apan wala sila’y gisuportahan bisan usa kanila.
Ang Simbahan pabilin sa panawagan nga kinahanglang adunay national renewal ug panaghiusa alang sa kaayuhan sa nasud. – /EIM) (BANAT NEWS)