Peke nga P1,000 gipalit og lechon
CEBU, Philippines – Nag-atubang og kaso’ng kriminal ang 38-anyos nga lalaki sa korte nunot sa pagbayad og peke nga kwarta sa pagpalit og lechon baboy.
Piyansa nga P12 mil ang girekomendar ni Prosecutor Raul Cristoria alang sa temporaryo’ng kagawasan sa akusado nga si Edmundo Pitong, taga Baryo Baho, barangay Calamba, Cebu City.
Si PO1 Eugene Empic sa Mabolo Police Station nagkanayun nga niadtong Pebrero 10, 2015 sa alas 6:25 sa gabii sa eskina A. Lopez ug Katipunan Streets, Labangon namatikdan ang usa ka tawo nga naghupot og peke nga P1,000 nga dungan niya nga mopalit og lechon manok.
Apan gibalik ang kwarta sa namaligya ngadto kang Pitong sanglit wala’y sensilyo.
Si Empic nagkanayun nga nibalhin og laing tindahan si Pitong ug nipalit og lechon baboy.
Diha’ng iya na unta’ng duolon, nakapalit na kini ug dali’ng nisakay sa traysikad.
Gisusi ni Empic ang namaligya sa lechon baboy ug nasuta nga peke ang P1,000 hinungdan nga dali niya’ng gisundan ang akusado sa eskina A. Lopez ug Lucio Drive, Calamba.
Iyang gikuha ang P900 sa posesyon ni Pitong ug giuli sa namaligya og lechon.
Tungod sa dili pagpasaka og kaso sa tag-iya sa lechonan, gidala ni Empic ang akusado sa Police Station ug siya ang nipasaka sa kaso. – /GMR) (BANAT NEWS)
- Latest
