CEBU, Philippines – Gihugopan sa daghang tawo ang gipasiugdahang Silhig Festival sa Barangay Paknaan, Mandaue nga gibuksan kagahapon pinaagi sa street dancing nga giapilan sa 11 ka contingents gikan sa 11 niini ka sitio.
Ang Silhig Festival maoy paagi sa paghatag og pasidungog sa mga lumolupyo sa Barangay Paknaan ngadto ni Senior Sto. Niño nga nagsaulog usab sa iyang tinuig nga pangilin niadto’ng Pebrero 7.
Si Paknaan Barangay Kapitan Malaquias Soco miingon nga ilang gibuwag ang indigay sa Silhig Festival sa tinuig nga pangilin aron masentro lang gayud ang maong adlaw sa nahisgotang kalihokan.
Dugang ni Kapitan Soco nga ang gipasiugdahan nila nga Silhig Festival maoy ilang paagi pagpasalamat kang Senior Sto. Niño ug gilambigit ang panginabuhi sa ilang mga lumolupyo nga pagpanggama og silhig.
Gitataw ni Kapitan Soco nga ang maong panginabuhi nga pagpanggama og silhig nga hinimo sa lanot gikan sa buli nasunod nila kini gikan pa sa ilang katigulangan.
Si Kapitan Soco miingon nga nangandoy unta sila nga dili lang ang pagpreserbar sa pagpanggama og silhig sa ilang barangay maoy himuon sa kagamhanan kun dili pangitaan unta kini og paagi nga molambo pa.
Dako ang pagtuo ni Kapitan Soco nga molambo pa ang pagpanggama og silhig sa Barangay Paknaan tungod kay gawas sa pipila ka ahensya sa kagamhanan, aduna ‘say mga pribado’ng kompaniya nga mitabang kanila. – /RUB) (BANAT NEWS)