Hinay ang halin sa buwak

CEBU, Philippines - Gamay ra og halin ang mamaligyaay og buwak karong tuiga kun itandi sa miaging tuig bisan pa nga barato ang presyo sa buwak karong panahona.

Ang mga mamaligyaay og buwak sa Freedom Park nga nahinabi sa Banat News kagahapong adlawa parehas ra og tubag nga menus g’yud ang ilang halin.

Si Jovelyn Gacayan, taga Busay, usa ka flower vendor,  nakamatikod nga gikan sa buntag dili kaayo daghan ang namalit itandi kaniadto.

Mobaligya ‘sab siya og tagsa ka buok nga buwak ug bouquet nga siya ra mismo ang mo-arrange niini.

Depende sa gidaghanon sa buwak gikan P400 ngadto sa P1,500 apan dunay pakapin nga stuffed toy.

Si Teresita Padernal, miingon usab nga hinay ang iyang halin karong tuiga, kadtong nangahalin sagad mga rosas nga puwa. Ang binuok nga rosas P30, apan may hangyo pa kini kutob P25. Samtang ang mga bouquet mokantidad og P200 ngadto sa P1,000.

Apil sa ilang serbisyo ang flower arrangement diin ang kustomer magdala og ilang buwak ug sila nalang maoy moplastada  og P250 ang bayad.

Sagad sa nipalit sa iyang mga bulak kagahapon mga estudyante ug mga batan-on nga trabahante.

Hinuon natagbaw si Manang Teresita kay ang tanan pulos tam-is og pahiyom human makahangyo sa presyo.  (BANAT NEWS)